རྒྱ་གར་བྱང་ཤར་བོད་རྒྱའི་ས་མཚམས་འབྲས་ལྗོངས་ས་ཁུལ་ནས་གར་སོང་ཆ་མེད་དུ་གྱུར་པའི་བོད་ཀྱི་དཔའ་བོ་ཞིག

གླིང་ཚ་ཚེ་བརྟན་རྡོ་རྗེ་ལགས་ཐོག་མར་ཕྱི་ལོ་ ༢༠༡༢ ལོར་རང་གི་ཨ་མ་ལགས་དང་སྲིང་མོའི་ལྷན་དུ་རྒྱ་གར་དང་བལ་ཡུལ་བརྒྱུད་བོད་བར་ཞི་བའི་གོམ་བགྲོད་གནང་འཆར་ཡོད་ཀྱང། བལ་ཡུལ་ས་མཚམས་སུ་ཉེན་རྟོག་པས་བཀག་སྡོམ་འོག་གོམ་བགྲོད་དེ་མུར་མཚམས་འཇོག་གནང་དགོས་བྱུང་ཡོད་པ་རེད། འོན་ཀྱང་གླིང་ཚ་ཚེ་བརྟན་རྡོ་རྗེ་ལགས་ནས་ཆ་རྐྱེན་གང་ཡང་མེད་པར་ ༧གོང་ས་མཆོག་བོད་ལ་གདན་འདྲེན་ཞུ་དགོས་པ་དང། ༧པཎ་ཆེན་རིན་པོ་ཆེས་གཙོས་ཆབ་སྲིད་བཙོན་པ་རྣམས་གློད་བཀྲོལ་དགོས་པ་སོགས་དགོས་འདུན་དོན་ཚན་ལྔ་ཆེད་བཏོན་གྱིས་ཕྱི་ལོ་ ༢༠༡༣ ལོར་གསུམ་བཅུའི་དུས་དྲན་ཉིན་ཁོང་ཁེར་རྐྱང་སླར་བོད་བར་ཞི་བའི་གོམ་བགྲོད་ཕེབས་ཡོད་ཀྱང། ལོ་དེའི་ཕྱི་ཟླ་ ༦ པའི་ནང་རྒྱ་གར་བྱང་ཤར་བོད་རྒྱ་ས་མཚམས་འབྲས་ལྗོངས་ས་ཁུལ་ནས་གར་སོང་ཆ་མེད་དུ་གྱུར་ཡོད་སྟབས། ད་བར་ཁོང་ཤི་གསོན་གང་ཡིན་སོགས་ཀྱི་གནས་ཚུལ་ཤེས་རྟོགས་མེད་པ་གྱུར་ནས་ལོ་བདུན་ཧྲིལ་པོ་འཁོར་གྱི་ཡོད་པ་རེད།